Kebian Bela’i di Sinubaanen muka’ Kebian Megdaga’*
Orlando Guilingan
1 Iini puunanen, ma’nini, ditu laak misuunan ku dun.*
2 Bekna, iin su tinalu’ guliman pa deli’. 3 Naa ki tinalu’ guliman, iini meksabutsabut su pa deli’ gama’ nug laki bu nug libun, atawaka lain getaw.
4. Naa mendadi, sa’ metubus itu, menengaw dayun lain getaw su gama’ nug laki, iini elapenen sugu’. 5 Iin su tinalu’ megbina’,*
6 Iini meguit sising atawaka bembeng, uitenen ditu megulang nug libun, dagid putusen munsala su sising. 7 Bena metubus, mpanaw dayun su sugu’.
8 Bena’ mateng ditug balay nu piglibunan, sa’ ndi’ pa menaik,meglelekebu deli’ay, iini gindan dun pu’ duuni getaw.*
9 Naa bena’ menaik na, metulan ditug buntalan, pediunen dayun gapu’ balay, laung, ‘Pegdayun ka da.’
10 Bena, sumbag su getaw, ‘Baa, * waa.’
11 Bena’ dayun pesigupen na iin, atawaka sa’ mengmama’, pemema’en.
12 Bena’ selian nilan megadapadap,* ukadenen dayun su sising pinutus munsala, betangenen dayun ditu takep nug la’apan.* 13 Iin dayuni telu’enen, ‘Naa, kini sa’ mesu’at da dini’a liagan ku sia sumalabuuk tug dani’a delendeman.* 14 Bu’ sa’ dema penenggi’ migaan ditug delendeman mu* kig danaan keni metuyu’ dini’a.’
15 Naa bena’ metubus ilan meksabutsabut, mektalu’ dayun su piglibunan, ‘Nandaw, ndi’ pau metau sumbag dun su talu’ mu. 17 Subay saakan ku pa deli’ sug bata’u.* 18 Laak meksesa’ ita sa’ ta endaway duni kepuli’ mu dini.’
19 Naa bena’ metubus, sa’ meliag da sug libun, naa sa ma’antu, metabuk. 20 Naa bena’ mateng santa’ gebii, puli’ na pelum su sugu’, pu’ siudanen sa’ mitabuk ma, sa’ nda’ ma.
21 Naa bena’ metubus, mektalu’ dayun su piglibunan, ‘Naa kiin pelum mekatag ditu tuyu’ mu, mesu’at da. 22 Dagid kini ig laun nu penguin ku dini’a selapi’, babuy, manuk, begas, bu gasi, sa’ mesangu’ mu dadema.’
23 Naa bena’ sa’ mesangu’en, metubus, mekpasad ilan dig bulan pu’ sa’ ta’ bulanay dun bu sa’ ta’ endaway dun kig bela’i nilan.*
24 Naa bena’ medepet di gendawan na nu sesa’ nilan, bingkalen dayun su piglekian.* 25 Naa bena’ metubus, mpanay na ilan, iini meguna, su sugu’, petitenga’en sug laki menginsawa.
26 Naa bena’ mesempel na ilan ditug balay nu piglibunan, duuni lumabet dinilan genat ditug balay. 27 Subay megbegay pa ilan selapi’ puli ilan mekenaik, kitu su tinalu’ puka egdan.’*
28 Bena’ metubus, pentiti’en dayun sug babuy bu manuk, laak painen sug dega’an nilan muka’ pekseluan nilan. 30 Sa’ sug duma, betangan gandug, pembekla’en ig lebuk, dayun pembutilukay, dayun pembitinay dulsi, bangbang, sigarilyu, muka’ nga gumanuk, pentuksuken ditu nga patal nu pimekla’ lebuk.*
31 Bena’ metubus, megilis dayun su nga pembel’iin. 32 Iini seluken nilan sug begu gupia. 33 Sug laki, mekseluk sub Sinubaanen, pinglu’upan,* muka’ salual Sinubaanen, binila,* muka’memangyu, mandal.* 34 Muka’ sug libun, ma’antu dadema. 35 Menuub Sinubaanen, muka’ menapis patagyung, muka’ memangyu palikat.*
36 Naa bena’ metubus, engain dayun sug libun bu sug laki.* 37 Laak duun dai munut dinilan dua’ tawan, laki dademai munut tu minginsawa bu libun dademai munut ditu penginsuaan. 38 Laak su munut tug laki menabit pais, badung.
39 Bena’ ditu na ilan pekseluan, lain dai mengingenaw* dinilan. 40 Naa bena’ sa’ ndi’ pa ilan maan, mektampugaw* dayun su piglibunan, iini sumbag dun su peglikian, iini sembag nilan dun, sambugaway.*
41 Naa bena’ metubus, maan na ilan dayun, muka’ meksengalay ilan. 42 Sug laki, sengalenen sug libun, muka’ sug libun, sengalenen dadema sug laki.
43 Naa bena’ metubus ilan maan, egaken dayun nug laki su sawanen, mangay ilan ditu puun bandi, pekebangan nilan.
44 Naa bena’ sinegay nilan minum, ukusen dayun sug dega’an nilan, bu duun dayuni malap selimbangun,* salumaya’,* tubu’tubu’,* siusay, bu’ su pideng nu manuk, makut dun.
45 Dayun malap pinggan, dekulan, iini seludan tug dugu’ manuk. 46 Bena’ metubus, sumbeli’en dayun su manuk, petanda’ dun sug salumaya’, siusay, selimbangun, tubu’tubu’, bu’ su pideng manuk.
47 Naa bena’ dega’en ilan, pekpungunen sug kemet nilan dua’, dunut telu’en nu megdaga’,* Kinii tu’us dun, pu’ amu dua’, miksenglangan na.48 Muka’ pa pagid, gindanan dun pu’ pinunasan na amu nug dugu’ manuk dakus gawa’ tu nga pemelii,* memala’ di salumaya’,* mengmaya’maya’ amu metubu’ dig dibabaw benwa kenii.
49 ‘Memala’ di selimbangun, mbangun niui ketubu’ niu’.*
50 ‘Memala’ di tubu’tubu’ kini, malap da niui ketubu’ niu.*
51 ‘ Memala’ di siusay kiin, amu da dua’i megusaysay di ketubu’an niu dinig dibabaw benwa.*
52 ‘Kini bala’ nu pideng manuk kini, amu da dua’i maa’ pengulakpak pirmi, kebal kepia ginaa niu.*
53 ‘Bala’ di gentay kini, amu da dua’i mentay dinig dibabaw benwa kini.’*
54 Dayun peluspelusen, ugid ditu gangas nilan muka’ di pelapa nilan, adun mpalus na sug laatan kulis nilan, ndi’ memala’ dinilan, memala’ ditu na dugu’ nu manuk dakus melabu’ na ditu katunawan.*
55 Naa sa’ ma’antu, mideksu’ itu.
