Su Gininisan Bebat*
Edgar Aleo
1 Naa, keni* ginis ngag bebat kini, pesuun name* dini su ngag launan gininisan kegamit dun, muka’ sa’ nanu laak megamit.
2 Naa kini ginadung,* ii nig betad nu nga mekegulang megabitabit, sa’ metaang dun mengintulugan su nga sambaten buat dig lain benwa, muka’ taang dun sa’ duuni nga peglumpuk nu nga Subaanen. 3 Taang dun, sa’ duuni gasi, sa’itada peginum. 4 Taang dun sa’ su nga mekegulang, megabitabit mekatag u ngag bata’ nilan delaga buka’ begutaw, peksebutan nilan sa’ mesu’at ma pegempu’en nilan.
5 Ki ginadung, sumelingka bebaten dadema sa’ duuni matay. 6 Sulanggani* ngalanen.
7 Naa ki semba’, balibali da nu ginadung, laak ndi’ mesu’at gemitay di minatay. 8 Mesu’at dadema gemiten sa’ megukit di Gempia Petenday mekatag dini Isukristu, atawaka diin dadema gininisan guksugan.
9 Naa, kiin pelum sinalig, bebat nug libun. 10 Laak bisan nga geseg, bebaten da nilan dema. 11 Naa, kig bebat keni, ii nig bian megabitabit nu nga getaw, dagid metatap gemitay sa’ sug laki, mauya’anen megabitabit tu nga libun. 12 Sug duma, meksinabut sug libun bu laki pebian di sinalig.* 13 Ki sinalig, melengas dadema sa’ megdedial tu Megbebaya’.*
14 Naa, kiin pelum belumin, ma’niin bian* nu sinalig, laak melaun megbebat dun, sug laki bu’ ngag libun. 15 Mesiba’ bebaten di pegdedial tu Megbebaya’, pu’ kig bebat kini, gilal bebat di pekpetail tu nga gembata’, tu nga kausebaan, sampay tug launan getaw.
16 Kig biayen kini ma’niin da nug lungli* bu’ belumin, laak kig biayen, meteling, maika’ su tengegen. 17 Dagid ki pemutiin dun, mesu’at megbali dai kepebian dun tug belumin.
18 Ki sandidi’ bu’ tini’aman, bebat nu nga getaw Telinga.* 19 Kig bebat kini, gemiten dadema nu nga getaw sa’ meguksug pebian di sambingay, naa subay megbebat sandidi’, muka’ padun sa’ megabitabit su nga gukum. 20 Gemiten da padun pedelang di gembata’.
